اهم النصائح لشحن طاقتك من جديد

1. وقفي إستخدام المسكنات عمال علي بطال، مش بس لإنها مضرة لصحة الكلي و المعدة، بس إستخدام المسكنات لمدة ١٠ ايام متواصلة هو احد اسباب الصداع اللي بتحسي بيها وبتخليكي تحسي إنك مجهدة دايما و مفيش علاج لألم الصداع
2. بلاش تشربي قد وزنك كافيين، سواء عشان تركزي او تسهري شوية خليه وقت الضرورة برضو لما تحسي انك محتاجاه، وعلي قد كوبايتين شاي او قهوة يوميا ماشي، لكن مش ٥ و مش ٧ اكواب يوميا خاااالص لإن بعد تعود جسمك علي الكافيين بترهقي و تتعبي من اقل مجهود
3. الحمل و الولادة و الرضاعة و المجهود بياخد من مخزون جسمك من المعادن و الفيتامينات فأحرصي علي التحاليل لإكتشاف الانيميا و نقص فيتامين د و الكالسيوم، وخدي جرعتك من المكمل الغذائي اللي كنتي بتاخديه فترة الحمل و متنسيش جرعة فيتامين ب٦ و ب١٢ عشان التنميل و تعب الأعصاب
4. اجلي عمل او اتنين من اليوم للغد، مش لازم تكوني واقفة طول اليوم لإكمال كل المهام، لو تعرفي تأجلي اجلي لبكرة لإن كدة كدة بكرة هيبقي برضو يوم طويل و مليان مهام
5. حاولي تفصلي شوية من التليفون و التلفزيون خصوصا قبل موعد النوم ليكي و لطفلك و دا هيقلل تعرضك للتوتر و الضوء الأزرق اللي بيسبب الأرق ليكي و لطفلك كمان
6. اهتمي بعمل روتين لمهام طفلك اليومية لإن بيكون من السهل التحكم في الطفل لما بيكون هو نفسه متوقع ايه اللي بيحصل او هيحصل دلوقتي
7. اتمشي يوميا او يوم بعد يوم بطفلك مش لازم نروح بعيد عن البيت، خليكي قريبة و البسي اكتر لبس مريح ليكي و لبسي طفلك لبس مريح للمشي و اتمشوا بس لو هو لسة معتمد علي الشيل جربي السترولر او اجليها لما تتأكدي انه هينزل يمشي مش يتشال
8. اطلبي مساعدة سواء للأعمال المنزلية او لحد تثقي فيه انه يقعد مع طفلك حتي ولو لساعة واحدة تريحي او تنامي فيها
9. لو مش عارفة تطلبي المساعدة، ممكن تستخدمي اجهزة منزلية تساعدك زي غسالة الأطباق، المكنسة الكهرباء، وحاولي تخلصي مهام يومك المنزلية في موعد محدد سواء بالليل متأخر او الصبح بدري وباقي اليوم علمي اولادك من سن ٣ سنين ان ترتيب ألعابهم مهمتهم هما و كافئيهم علي كدة بس مش بحلويات
10. خلي السناك اللي بتاخديه حاجة خفيفة تساعدك تصحصحي مش تتقلك زي السلطة، كوب زبادي، فاكهة عادية او مجففة، مكسرات بس بلاش كل سناك يكون كيك او كحك او وجبات جاهزة او مقليات
11. قللي استهلاك السكر في يومك، لإنه بيجهدك وبيقلل تركيزك و بيضعف مناعتك وبلاش شرب مشروبات غازية بشكل يومي كفاية مرة واحدة في الاسبوع عشان الم العظام اللي بتحسيه طول الوقت

ومش لازم تكوني هتعمليهم كلهم بس علي الاقل اهتمي بصحتك و تغذيتك خصوصا إن النوم مش مضمون .